Architeti e Architetura (3/4): TOBIA SCARPA

TOBIA SCARPA – el ze un architeto e designer veneto, nato a Venesia inte’l 1935, fiol de l’architeto Carlo Scarpa. Łaureà inte’l 1957 a ło IUAV de Venesia, par łongo tenpo el ga łaorà insenbre a só mujer Afra Bianchin (1937-2011).

Inte ła só cariera Tobia el ga desenjà ojeti de aredo, mòbiłi, łanpade, el ga projetà fàbreghe, abitasion, boteghe e spasi espozidivi, el ga restaurà pałasi, viłe, caze.

El se ga meso in zogo in tuti i canpi de’l desenjo, de ła projetasion e de łe arti aplicàe e, par ‘sto motivo, el pol èsar considarà cofà un protagonista de l’architetura nasesta in sèito a’l Movimento Moderno. Na bona parte de łe sò òpare łe ze in Veneto.

El sò ùltemo łaoro, de’l 2018, el ze el restauro de łe Vecie Prizon strìache de Trevizo, trasformàe in moderne gałerie espozidive.

~

Da’l Łunaro Veneto 2020, Setenbre in 4 artìgołi:

  • SETENBRE/1 – COCIOPESTO
  • SETENBRE/2 – MURE DE TREVIZO
  • SETENBRE/3 – TOBIA SCARPA
  • SETENBRE/4 – PREMIO ODERSO
Dizitałizasion de’l testo de Setenbre 2020 de’l Łunaro Veneto 2020.
Reprodusion autorizà da Academia de ła Bona Creansa