ŁE VARIETÀ GÒTEGHE VENETE (1) – El stiłe gòtego el se forma da prima inte łe maestoze catedrałi fransezi de’l XIII sècoło sparpanjàndose zvelto in tuta Eoropa. In Veneto el riva traverso ła Łonbardia e el se dezviłupa, zmisià co’l romànego, a partir da’l Santo de Pava. Ła bazélega pavana ła deventa cusì modeło de partensa pa’ łe òpare nove cofà San Łorenso a Vicensa (1281), onde che łe conpare łe volte a crozera co i costołoni, e Santa Anastazia a Verona (1290) onde che ła strutura la predòmina so ła muradura e ła vertegałità spasiałe ła vien enfatizà conforme a’l gòtego franseze, che a cueło el se ispira anca l’orizenałe portałe a trumeau co ła statua. Ła soreła pì granda de ‘sta cieza, fata su senpre da i domenegani, ła ze San Nicołò a Trevizo: de dimension poderoze, co’l sofito a carena e’l presbiterio a vetrade che’l deventa na “parete de łuze”.
Da’l Łunaro Veneto 2022, Febraro in 4 artìgołi:
- FEBRARO/1 – ŁE VARIETÀ GÒTEGHE VENETE (1)
- FEBRARO/2 – ŁE VARIETÀ GÒTEGHE VENETE (2)
- FEBRARO/3 – EL PAŁASO DOGAŁE INTE’L 1300
- FEBRARO/4 – LA CAZA VENESIANA MEDIEVAŁE
