Architetura Medieval Veneta (3/4)

I PAŁASI COMUNAŁI VENETI (1) – A partir da’l XII sècoło anca łe sità venete łe deventa Comuni łìbari autogovarnài da insenbrèe popołare. Espresion architetònega de ‘sta połìtega nova i ze i pałasi comunałi anca diti “pałasi de ła rajon” (palatia communia), che i vien su inte’l cor de łe sità co l’ezijensa de ospitar a’l pian teren atività pùbleghe e private e, invese, solche atività de pùblega aministrasion e goerno a’l piano suparior. Verona par prima (1136) ła deventa Comun łìbaro e ła fa su el só Pałaso de ła Rajon inte’l 1196, fondà so n’inpianto planimètrego a corte derivà da i ciostri de i monasteri. Da prinsipio in stiłe romànego, col’ tenpo el vantarà modìfeghe in stiłe gòtego soto ła sinjorìa scałìzera e, soto el goerno veneto, A ghe sarà zontà ła sèłebre scała esterna cuatrosentesca.