Ła Piasa de i Siori a Trevizo II (2/2)

ŁA RENOVASION DE ŁA PIASA DE I SIORI – El Pałaso de’l Podestà, inte’l 1874, el gavéa biò de un intarvento de reprìstino struturałe. Tra łe tante idée par organizar el bando A ga prevałesto cueła de recostruir in łibartà de stiłe un edifisio novo che’l se armonizase co’l resto de ła piasa. E cusì el Boito, vinsendo el concorso, el ga podesto métar in canpo łe só teorìe sora el “stiłe nasionałe”. El prozeto el ze stà portà vanti da l’inzenjer Giulio Olivi e za inte’l 1877 el pałaso el jera pronto. A difarensa de cueło vecio ‘sto cuà novo el se prezenta cofà ła repropozision de i antighi pałasi comunałi romàneghi łonbardo-emiłiani (par ezenpio de Ferara, Cremona o Piacensa), asè schemàtego e simètrego a leveło conpozidivo e con’l dòparo de i cuerełi a vista. Oltra che mancar de orizinałidà el pałaso novo el ga scansełà de’l tuto el caràtare architetònego presedente che’l jera invese autentegamente veneto e cusì ła piaza intiera ła ga fenìo par èsar deznaturà, visti anca i intarventi drioman inte ła Tore Sìvega e inte’l Pałaso de i Trezento (co ła recostrusion de ła merładura medievałe prima guelfa e dapò ghibełina).