TONBA BRION A SAN VIO DE INTIOŁE – (Marca Trevizana 1970-1978, architeto: Carlo Scarpa) Ła ze ła tonba de fameja de i Brion: on monumento fùnebre che el ze tuto fora che monumentałe.
El projeto el ze stà comisionà inte’l 1969 da Onorina Brion Tomazin, par onorar ła memoria de’l só defunto marìo Bepi Brion, inprenditor veneto fondador e paron de ła BRIONVEGA.
El conpleso architetònego el se artìgoła in vari spasi: i propiłèi, l’arcosołio co i sarcòfaghi de i du spozi, l’edìcoła co łe tonbe de i parenti, el tenpieto e’l padiłion de ła meditasion. Tute ‘ste tape łe ze traversàe da un parcorso de acua che, inte ła só siclisità, el raprezenta el devenjer eterno de ła vita daspò de ła morte.
I materiałi doparài i ze calsestruso, łenjo, bronzo, marmo e tuti i detaji costrutivi i ze stà parsonalmente desenjà a man da l’architeto veneto che’l ga vołesto èsar sepułìo purpio łà, inte un cantoneto fora de łe mure de la tonba.
~
Da’l Łunaro Veneto 2019, Novenbre in 4 artìgołi:
- NOVENBRE/1 – Na paroła: MARMORIN
- NOVENBRE/2 – Un posto: TONBA BRION A SAN VIO DE INTIOŁE
- NOVENBRE/3 – Un parsonajo: CARLO SCARPA
- NOVENBRE/4 – Un evento: ŁA MOSTRA INTARNASIONAŁE DE ARCHITETURA (VENESIA)
