Piero Gonzaga (2/4)

Łe corte padane – Inte’l 1772 Pietro, romài ben invià inte l’atività de senògrafo el łasa Venesia par ndar Miłan, łaorando par vari teatri e soratuto pa’l Teatro alla Scala. El senògrafo el ze pitor che’l se òcupa de łe senografìe che łe ghe fa da sfondo a łe òpare teatrałe, na profesion par njente scontà e secondaria ma che, ansi, ła rechiedeva enorme capasità artìsteghe e intełetuałe par reałizar dełe òpare a efeto, adate a’l tema de’l spetàcoło e che łe incontentase i gusti de un pùblego colto e dełicato. A Miłan Pietro el parfesiona uncora de pì łe só abiłità: sfrutando i contrasti de cołor e i efeti de łuze l’è in grado de infóndarghe a łe só piture un alto grado de verosimiłiansa. El porta vanti projeti anca in altre sità come Parma e Monza e el ga anca ła posibiłità de far un viajo Roma dove che el studia i monumenti antighi.