Piero Gonzaga (3/4)

In Rusia – Inte’l 1792 Pietro, gavendo colpìo co łe só òpare el diplomàtego ruso Nikolaj Borisovič Jusupov in viajo in Itałia, el vien invità a trasferirse in Rusia, a Pietroburgo, che a chel tenpo ła zera a capitałe de l’inperadora Caterina ła Granda. El reseve suito varie comision da ła fameja reałe come anca da i alti aristocràteghi che i fazeva parte de ła corte e torno de łu A se reunise un sciapo de altri artisti e de arlevi. Da recordare el łongo raporto co Marija Fëdorovna, mojere de Poło I sucesor a’l trono dopo de só mare Caterina, che ła se ga afidà a łu par ła reałizasion de tanti projeti, cofà ła sistemasion de vari anbienti interni de’l pałaso e de i só zardini o ła reałizasion de’l só teatro da càmara. Pietro el ga anca conposto un manuałe dove che l’esprime łe só teorìe e conosiense pitòreghe par reałizar łe senografìe teatrałe.