ANDRÈA BRUSTOŁON (20 łujo 1662 – 25 otobre 1732) – el ze stà un noto intajador de’l łenjo nasùo Bełun e che’l ga oparà inte ła Repùblega Veneta. El se ga dedegà a reałizar sia mòbiłi de prezo pa’l patrisiado, cofà careghe, sofà, candełabri e portavazi, che sculture a tema sacro par ornar łe cieze. Inte ła creasion de pałe da altar, crozefisi, tabernàcołi e grupi scultorei el se confronta co l’anbiente artìstego baroco de ła Venesia de’l só tenpo, in partegołar co ła pitura so teła e ła scultura so marmo. Donca l’è bon de far sù sculture połìcrome e indoràe studiàe par i efeti de ła łuze o depinte de un bianco ciaro che łe mandase łuzori come de marmo. In varie conpozision A se nota anca ła reserca de dinamizmo e asion de i sojeti raprezentài. Par łe só abiłità l’è stà defenìo da’l romanzier franseze Honoré de Balzac “Le Michel-Ange du bois”, “El Michełànzoło de’l łenjo”.
~
Da’l Łunaro Veneto 2021, Zenaro in 4 artìgołi:
- ZENARO/1 – ANDRÈA BRUSTOŁON
- ZENARO/2 – I CUATRO EVANZEŁISTI
- ZENARO/3 – BRUSTOŁON A’L CUIRINAŁE
- ZENARO/4 – SÌRMOŁO
