I CUATRO EVANZEŁISTI – òpara de l’intajador e ebanista Andrèa Brustołon, “I cuatro evanzełisti” ła ze considarà una de łe pì bełe creasion de’l maestro. Termenà verso l’ano 1700, l’è na scultura recavà da’l łenjo de sìrmoło, dapò indorà e połicromà. Ła ze stà reałizà par ła cieza de Santa Croze de Bełun e ła gaveva ła funsion de contenjer ła rełicuia de San Verìsimo màrtire, conservà inte un vazo rento el globo sełeste. Ła conpozision ła prezenta łe cuatro monumentałe figure de i evanzełisti che i sostien insieme el globo, imortałài inte’l sforso estremo che l’asion ła conporta. Łe poze łe rezulta sconposte e contorte inte łe movense de i corpi conpanjàe da łe pieghe de i vestidi, i zvardi i ze tezi e revoltài in baso o, pa’ l’avanzełista de dreta in pie, l’espresion ła ze fin sofarente, co ła boca verta e i oci che i varda alto. Ła scultura, soravisùa a ła sopresion de ła cieza durante el parìodo napołeònego, ła ze atualmente conservà a’l Muzèo Diosezan de Feltre, ndove che ła ze esposta.
~
Da’l Łunaro Veneto 2021, Zenaro in 4 artìgołi:
- ZENARO/1 – ANDRÈA BRUSTOŁON
- ZENARO/2 – I CUATRO EVANZEŁISTI
- ZENARO/3 – BRUSTOŁON A’L CUIRINAŁE
- ZENARO/4 – SÌRMOŁO
