BRUSTOŁON A’L CUIRINAŁE – inte’l pałaso de’l Cuirinałe a Roma A se cata ła sała “del Brustolon”, da dove che’l presidente de ła Repùblega el tien el discorso de fine ano. El nome de l’artista l’è stà sernìo parché ‘sto anbiente l’è aredà co un grupo de dódaze poltrone intajàe da’l Brustołon. Łe dódaze careghe łe raprezenta el siclo de i dódaze mezi e onjuna ła ze decorà co motivi de piante e animałi drio el meze che ła ga come tema. A ghe ze par ezenpio ła carega de setenbre che ła reciama ła vendema co i poza brasi costituìi da na serie de cai de vizełe, intajài finamente. L’idèa de crear mobiłio de alto vałor artìstego dotà de decorasion tridimensionałe che łe remande a’l mondo naturałe ła sarà reciapà da’l movimento de l’Art Noveau do sècołi dopo. Inte’l steso pałaso A ze anca prezente łe careghe de n’altro artista veneto de orìzene zoldane, Vałentin Pansera Bezarel, ebanista de l’Otosento che’l ga łaorà de frente par caza Savoja.
~
Da’l Łunaro Veneto 2021, Zenaro in 4 artìgołi:
- ZENARO/1 – ANDRÈA BRUSTOŁON
- ZENARO/2 – I CUATRO EVANZEŁISTI
- ZENARO/3 – BRUSTOŁON A’L CUIRINAŁE
- ZENARO/4 – SÌRMOŁO
