CAOŁAORI IN ŁENGUA D’OC E D’OIL – inte l’Europa medievałe łe prime grande łetaradure volgare łe ze stàe cuełe in łengua d’oc e łengua d’oil. In łengua d’oc, parlà inte ła Fransa meridionałe, A venjeva scrite łe famoze poezìe łìreghe amoroze che łe conta de’l cavałier inamorà de ła beła dama. In łengua d’oil, invese, parlà inte’l nord de ła Fransa e antenata de’l moderno franseze, A venjeva scriti i poemi èpeghi cavałereschi, come cuełi so Artù, Tristan o Carlo Manjo.
Apresàe in tuta Europa, ‘ste òpare łe deventa modełi łeterari da reciapar e reprodùzar. In partegołar, A ze inte ła Venetia che se forma ła “łetaradura franco-veneta”, fata de conponimenti reałizài da scritori veneti in łengua d’oc o d’oil co temàteghe e argomenti somejanti a i modełi, ma co èziti de łeveło asè ełevà. A se połe sitar, par ezenpio, poemi cofà “l’Entrée d’Espagne” de un anònemo padoan, l’”Aquilon de Bavière” de Rafaełe da Verona, łe poezìe de tema amorozo e połìtego de’l patrisio venesian Bartołomèo Zorzi.
~
Da’l Łunaro Veneto 2021, Setenbre in 4 artìgołi:
- SETENBRE/1 – CAOŁAORI IN ŁENGUA D’OC E D’OIL
- SETENBRE/2 – I CONJOMI VENETI E I POEMI CAVAŁERESCHI
- SETENBRE/3 – EL PLURIŁENGUIZMO DE ŁA VENETIA MEDIEVAŁE
- SETENBRE/4 – EL CASTEŁO DE AMOR
