EL CASTEŁO DE AMOR – tra łe sità venete inte l’età Medievałe, el pì inportante sentro de resesion e studio de ła łetaradura corteze franseze ła zera Trevizo. In sità A rivava e venjeva copiài vari manoscriti in łengua d’oc e d’oil.
Alberigo da Roman, fradeło de Ezełin III, che par tanto tenpo el ga controłà Trevizo, el ga acetà e protezesto famozi trovadori cofà Uc de Saint-Circ e łu steso el ga conponesto poezìe in provensałe (purtropo A ghe ne ze soravisùa solche una). A demostrasion uncora de ‘sta inportansa de Trevizo par ła łetaradura e’l vìvar corteze A ghe ze un fato capità inte’l 1214. El cronista medievałe Rołandin el ne conta che A zera stà costruìo da’l Comun un casteło aposta par ‘sto zogo: inte’l casteło intrava un sciapo de dame vestìe splendidamente, piene de stofe e zoje siore, che łe gaveva co ‘sti vestidi da deféndarse e protèzar el casteło. Da fora, dełe scuadre de cavałieri i gaveva da espunjar el casteło łansando fruta ezòtega, fiori e spesie. Na bataja finta, insoma, fata de cołori e profumi in onor de Amor.
~
Da’l Łunaro Veneto 2021, Setenbre in 4 artìgołi:
- SETENBRE/1 – CAOŁAORI IN ŁENGUA D’OC E D’OIL
- SETENBRE/2 – I CONJOMI VENETI E I POEMI CAVAŁERESCHI
- SETENBRE/3 – EL PLURIŁENGUIZMO DE ŁA VENETIA MEDIEVAŁE
- SETENBRE/4 – EL CASTEŁO DE AMOR
