Piero de Àbano e Marco Poło (1/4)

ŁA “DIFFERENTIA” – Intrà łe poche notisie serte che gavemo so Piero de Àbano, una ła ze ła conosensa de łe òpare de Marco Poło. El só intarese el ze nasesto pa’l fato che’l “Marcus Venetus”, come che łu steso el ło ciama so’l Conciliator, el ga scrivesto sora el sieło e i só astri durando i só łonghi viaji. A par foresto revardo a ła nostra vizion de’l mondo che ła razon che’l ło ga istigà conósarlo ła sipie ła posibiłità o manco che pose èsarghe condision favorévołe par ła vita soto ła łinea de ł’ecuator. Epur so ła differentia 67 de l’òpara A se discore drio el mètodo de ła quaestio propio sora ’sto problema cuà. Strucando, A se pol dir che co’l studio de ’sta quaestio A se pasa drioman serte opinion buziare par cunfudarle doparando chel mètodo sientìfego che’l zera drio dezviłuparse da łu e insenbre co łu.