Resitadivo venesian (Andrea Zanzotto)

RÈITIAI S’AINÀTEI VEBÈLET
(a Reitia Sanadora Tesidora)

Vera figura, vera natura,
zlansada in ragi come n’aurora
che tuti cuanti te ne inamora:
to fià ze ’l vento, siroco e bora
che zvegia zgrìzołi de vita eterna,
sinjora d’oro che ne governa

aàh Venesia   aàh Regina   aàh Venuzia

Oci de bisa, de baziłisa,
testa de fogo che’l giaso inpisa,
nu te preghemo: zbrega su fora,
nu te inploremo, tuto te inplora;
móstrite sora, vien su, vien su,
tiremo tuti insieme, ti e nu

aàh Venesia   aàh Venisa   aàh Venuzia

Testa santìsima, piera e diamante,
boca che parla, rece che sente,
mente che pensa divinamente,
vien su, futuro nostro, vien, dai,
dai baranài tananài tatafài,
zgorlemo i sisi misiemo i sonaji

aàh Venesia   aàh Venegia   aàh Venuzia

O come ti cresi, o łuna de i buzi fondi,
o come ti nasi, cavegi blu e biondi,
nu par ti, ti par nu,
ła gran marina no te sera più,
łe gran barene de ti se inlaga,
vien su, dragona de arzento, maga!

aàh Venesia   aàh Venaga   aàh Venuzia

Putina perla, putina unica
che zo ti fifi ne ła to cuna,
che zo ti zlìmeghi che zo ti bùłeghi,
vien ne ła rede, fane fortuna,
dane in amor ła to manina beła
fata a peneła fata a peneła

aàh Venesia   aàh Venùnuła   aàh Venuzia

Sinjora granda, testa che masa
masa ne pasa, che cuazi ne schisa,
Dia de i sostenji de ceze e pałasi
Dia de łe taje che su ne tien fisi
Dia de łe onde che łe ne fa grasi,
ne ingrasa de onji grasia, Dia Venesia

aàh Venesia   aàh Venasia   aàh Venuzia

Varda parona ‘ste strase, ‘sti brasi,
varda tra i ori ‘sti povarasi,
buta su l’ocio, móntete su,
tìrene su, nu da ti, ti da nu,
date da far par farne frutar
fruti partuto, par tera e par mar

aàh Venesia   aàh Frutanja   aàh Venuzia

Metéghe i feri, metéghe i pałi,
butéghe in goła ‘l vin a bocałi,
incocóneła de bon e de megio;
ła ze inbriagona, ła ze manjona,
ma chisà dopo ma chisà dopo
cosa che ła ne dona!

aàh Venesia   aàh Venaia   aàh Venuzia

Toco de banda, toco de njoca,
Scuinsia e baron che a nu ne toca
par spoza e mare, niora e comare,
soreła e nona, fioła e madona,
ónzete, zmòłete, zbrìndoła in su –
nu par ti, ti par nu

aàh Venesia   aàh Venoca   aàh Venuzia

Ma cosa zeło che zo te striga
ma cosa zeło che zo te intriga;
mona ciavona, cuła cagona,
baba cataba, vecia spusona,
nu te ordinemo, in suor e in łaor,
che su ti zboci a chi te sa tor

aàh Venesia   aàh Strusia   aàh Venuzia

Ah, ła se inpétoła senpre de più,
Ah, ła ne casca via da łe sate
fora da’l piato,
‘sta testa małedeta,
‘sta redòdesa mata,
ła ne zbandona zo inte’l pałù,
tuto se scoła, no ghe ze più.