Poło Veneto (4/4)

Ła consequentia materialis – Un ezenpio vàłido de cueło che ze stà dito fin deso el ze cueło raprezentà da ła “consequentia materialis”. Za da’l nome, A podemo fin da suito intivar come che l’infarensa łòzega ła sipie łigà a calcosa de “materiałe”. Par capir mejo, A se pol partir da n’altra contrapozision in ànbito łòzego: cueła intrà ła “consequentia materialis” e ła “consequentia formalis”, onde che ła ze propio ’sta ùltema cuà che ła dize come che ła vałidità de na infarensa ła gapie da vardar soło a ła só artegołasion sintàtega, astraendo da’l senjifegar de i tèrmeni. Par contro, par Poło ła vałidità de ła prima no ła pol no tènjar conto de cueło che ’sti tèrmeni i senjìfega. Se par l’infarensa “formałe” ła norma de vałidità ła ze el “come” che ła se dezviłupa, par cueła “materiałe” ła norma ła comanda de vardar anca a’l “cosa”, a i tèrmeni che i ze ojeto de demostrasion.