L’ua (Leo Miglioranza)

L’UA

(parołe, voze, rangiamento: Leo Miglioranza)

Poso tenjer el sol in man,
graspi de sangue scuro in man.
Ua, ua rento łe seste
łe seste e’l caro se inpenise
che i gran vol scanpar.

Onde zeła finìa cheła toza łà?
Da ‘sta primavera ła ze stravià.
Che conbinasion anca ’l mio
el me par insemenìo
el go visto ndarghe drio par de łà.

Che sia vin da mesa granda,
che no’l sia vinasa!
Che sia vin da pajołana,
no’l sarà mai masa!

rit.  Mama el sol so ła vinja ła zlusa de oro,
       tuti che tra zo graspi e che canta in coro!
       Onde ndarała n’altra volta tuta ‘sta zente
       i tozatełi i se rabalta ma no i se fa njente!

Piè descalsi i va de cuà e de łà,
el vecio Nane el ze drio brontołar.
El ghe mostra ła bagołina
tuti i siga pì de prima
speta speta co i go soto man!

El se senta zo a rumegar,
a’l vin che l’ua me pol dar.
Un goto prima de ła menestra
pa’l dotor sarà tenpesta
fame sercar ‘sto mosto cuà.

Che’l sia pinjoło o pinot,
marzemin o merlot…
Sciao, gropel, rabozo,
pìcoło, cabernet…

rit. Mama el sol so ła vinja….

Pasa de man in man, de sesta in sesta,
straca de sol, capel de paja su ła testa.
Ła rivarà su’l tin, eco el perché i ła pesta
se venjarà vin bon sarà vozi de festa.

Onde sarà tuta ła zente
fora da ‘sto tenpo,
sora łe stradełe de ‘sta tera
sparsa in giro da ‘sto vento.

Onde sarà tuta ła zente
deso che vien inverno,
sora łe stradełe de ‘sta tera
sora łe strade de ‘sto mondo.

rit.  Mama el sol so ła vinja…
(x2)

Ła canson ła ze stà scrita da’l cantautor trevizan Leo Miglioranza che ła ga mesa rento el disco intitołà “Ndemo Zente” (scrito con ła grafìa ” ‘Ndemo Xente”) publegà inte’l 2009. ‘Sta òpara ła contien canson scrite tute in łengua veneta, co’l contributo anche de Gianluca Nuti, Alberto Cendron, Antonio “Mastro Buba” Ferracin, Davide Camerin, Giorgio Barbarotta e Alberto Ceschin.

Lascia un commento