CANTORA NOSTRA SISIŁIANA – Patrizia Laquidara (Catania, 1972) ła ze na cantaudora sisiłiana de nàsita e veneta de adosion. Inte’l 2011 la ga publegà l’albo intitołà “Il Canto dell’Anguana“, na òpara prezévołe e intaresante, tuta cantà in veneto e sonà co ła cołaborasion de i muzeghisti vizentini de’l grupo “Hotel Rif”.
Łe łìreghe, in łengua veneta, łe ze stàe scrite da’l poeta Enio Sartori, che’l vien da l’Alto Vizentin, e łe reciama el mito de Reitia e de łe Anguane. Ła cantante cataneze ła ofre na prova parfeta in łengua veneta, pur no sendo ‘sta cuà ła só marełengua.
A réndar tuto uncora pì gustozo el ze el tapéo sonoro de mełodìe e rìtmeghe tipegamente mediteranee. A i cori de łe canson łe ga partesipà łe “Canterine de’l Feo“, un grupo de siore veciote de na contrà de Monte de Mało.
~
Da’l Łunaro Veneto 2021, Majo in 4 artìgołi:
-
MAJO/1 – CANTORA NOSTRA SISIŁIANA
- MAJO/2 – MARGHERA ROCK
-
MAJO/3 – JUDITHA A NEW YORK
-
MAJO/4 – UN DISCO TUTO TREVIZAN
Dizitałizasion de’l testo de Majo 2021 de’l Łunaro Veneto 2021.
Reprodusion autorizà da Academia de ła Bona Creansa
