Na caza co’l cacaro
mùzega de i The Groovy Monkeys
Cuesta cuà ła ze ła me canson e ndemo via driti:
na caza co’l cacaro!
Par tuti cuanti cuełi che ga ła nostalgìa de łe canpanje, chi che no ghe àbita più
e cuełi che i ghe ła ga manjà łe cità sensa che i se ne incorzese.
Onji volta che se fa na òpera publica pare che sia fata pa’ ła volontà de’l pòpoło,
pa’ fało stare ben, ma cuando che te vedi centri comerciałi che i nase come i funghi co piove
te te domandi dove che ze el ben de’l pòpoło, dove caso zeło….?!
Sì… ah beh!
Gheto capìo…?!
Me piaze co ze caldo stare in canpi fin tardi,
in conpanjìa de’l can e fra łe ganbe sincue gati
– a propòzito – i gati mii no i manja scatołete
sarà par cueło che in giro no go pì maregołete.
Inpianto mełansane, pomodori e tegołine,
fazołi, sucołi e altre streje de gonbine.
Senpre łà che sapo, sterpo, cavo erba
e co ze ora de concime cosa buto?
Merda!
Se capise! Varda cuà ła roba come ła crese,
‘sto ano verze sofegàe e patate łese.
Ocio, spanocio, finché no so in zenocio,
faso marendin a pan biscoto e sepe in tocio,
taco su ła stua e faso ła połenta so ła całiera,
go na secia de fazołi che destégoło ‘sta sera.
Njente de speciałe – so’ miga un grèbano –
ma njanca rizo in bianco e na ganba de sèdano!
Rit. Na caza co’l cacaro,
un łeto, un armaro,
cuzina co’l seciaro,
un fogo che fa ciaro!
Na caza co’l cacaro,
tetoia pa’l caro,
gałine so’l ponaro
e pa’ dadrìo un łeamaro! (x2)
Siè de ła matina e me zvejo come un grejo,
bevo un cafełate e salto via come un conejo.
Sì-sì, sì-sì, faso un CD e ze ok…
ma prova ti starghe drio a ła stała co i porsełi!
A’l bosco de castanji pa’ mołare calche liègore
me manca soło un fià de posto pa’ mołare łe piègore,
mołare do porsełi in mezo a łe venje che i rùmega,
– bìgołi co ła ługànega e na fiasca da ła càneva –
co vago Cioza porto caza i bizati,
un fià de radiceto e faso festa co i tozati,
a mi el me piaze cruo, a tanti coto co’l formajo
scaltrìo so na tecia co do spìgołi de ajo.
Purè co’l muzeto, sopresa co’l spago,
e dopo sora tuto un bel un toco de Aziago,
se trata de “minestrina de dado”
contro pan biscoto e vin roso co’l sałado!
Rit. Na caza co’l cacaro…
Me vołe el tenpo che’l me vołe co me sento a toła,
mi no so’ el tipo da patate e coca coła,
do minuti pa’ ła fia, manja de corsa e scanpa via…
– moro, caza mia no te saji porcarìa! –
Crema de spàrazi, crema de cachi,
crema de cràuti: score come ràudi!
Ghe ze na gran difarensa che te senti fra el profumo de cazada,
e ła spusa de casada…
Go un déo che’l ze zało
e me fa małe el cało,
prima che venja sera tajo łe onge de’l cavało…
Go un déo che’l ze zało
e me fa małe el cało,
prima che venja sera A ghe tiro el coło a’l gało! (x2)
Canson che Herman Medrano (Ermanno Menegazzo) el ga publegà ła prima volta inte’l disco “Fiso e tachente” de’l 2003, onde che ła ze cantà insenbre co i Catarrhal Noise drio un aranzamento tipegamente hip hop. Ła varsion de’l video ła ze contenjùa inte’l disco “Simie” de’l 2012, fato su co canson tute cantàe da’l vivo durando i conserti, e co l’aconpanjamento muzegałe de’l grupo “The Groovy Monkeys” che i sona in stiłe ska / funky / jazz.
