Te ghè un sarveło (Herman Medrano)

Te ghè un sarveło

parołe de Herman Medrano (Ermanno Menegazzo)

Ah! Cuesto ze uno speciałe par tuti cuełi che i ga decizo de serarse in caza,
o no i riese a venjérghene fora: pa’ ła paura, pa’ injoransa, pa’ convenjensa… seeee!
Par tuti cuełi che no vede, o no vołe védare, fora da ła só fameja,
da ła só cerchia o da ła só cieza…. o da ła só botega.
Moła tuto e date na mosa! Prima che sia masa tardi e che’l sarveło el te s’indurisa…

Łasa che i fasa, che i diga, che i pensa,
sò che dà fastidio i problemi de ingerensa,
sàrate in caza meti un déo in cuło e naza
el profumo de l’otimizmo che’l pervade ła zente persuaza.

Te fe versi, verzi i oci,
ocio dove che te toci,
se te poci in serti posti
łe ze broze so i zenoci.
No te ghè un sarveło
o el tuo el ga un zbrego,
fàtene uno co i Lego,
se te ło vołi te ło spiego.

Canbia el vento, altra facia, altra farsa, altro governo.
Chi ghe casca? Boh! Mejo l’Alaska in inverno…
Ła zente ze marsa, ma marsa a l’interno:
co ze piena ła pansa tuto resta fermo.

Mi no poso insìstere co ti che te vołi rezìstere,
e onji roba che te digo senbra strana a prescindere.
Varda che’l no ze suóre, łasa stare el dotore,
va co le suòre a Mediugore, me sa che a ti te ocore!

Rit.     Te ghè un sarveło, che njanca un can!
Te ghè un sarveło, vuto na man?
Te ghè un sarveło, łasa stare!
el to sarveło… no stà pensare
Te ghè un sarveło, che njanca un can!
Te ghè un sarveło, vuto na man?
Te ghè un sarveło, łasa stare!
Ti no stało doparare…

    Pasa el tenpo gira el vento, métete in mostra,
‘sta roba cuà ze nostra, ‘sta roba cuà ze nostra…
Pasa el tenpo gira el vento, métete in mostra,
‘sta roba cuà ze nostra, ti va a farte i giri in giostra!

Te vołi che te diga venjo, no sta’ pasare el senjo,
a’l tełèfono te si de łenjo e sensa alcun ritenjo.
Rimeti ła testa in sosta che te se ronpe ła crosta,
fate na domanda e uza ła risposta come suposta.

Ze da insulso:
pèrdare tenpo co ti.
Ze un insulto:
łe to proposte bone ze ndà fora co l’indulto.

Pozision strana, acua so na recia,
sarveło inruzinìo pa’ colpa de na docia.
Te ghè tolto un sarveło uzà fazendo un asta eBay
ma’l ga da ver difeti fate dare indrìo i schei.

Masa beghe, manco seghe, a mi no te me ła conti,
no se połe sararse in caza e dire de esplorare i mondi.
Co i to łibri de fantazìa, fose anca fiłozofìa,
ze ła to vita nò ła mia! Sona come na łiturgìa…
E crédeme se vede na furbisia come pochi,
sarveło in scàtoła de montajo e te ghè vansà de i tochi!

Rit.     Te ghè un sarveło che njanca un can!

Ohu! Testa de łenjo… zio ganeła!
Dove ło gheto tolto chel sarveło… a l’Ikea?
Ło gheto tolto a rate o zeło in conto tersi?
Dime, co cheła roba łà davero te ghe pensi?
Continua a fare versi, ma ghe rìvito?
O a càuza de masa feste te ło ghè za meso soto spìrito?
E tanto pa’ fare el figo te ło ga fato anca flanbé…
Ti no te ghè pì un sarveło… te ghè na feta de pancarè!

Canson contenjùa inte’l disco “Te toca ti” publegà inte’l 2009. Herman Medrano, nome d’arte de Ermanno Menegazzo,  el ze stà un tra i primi autori de la siena muzegałe veneta a gaver doparà ła łengua veneta inte’l zènare muzegałe hip hop e rap.

Leggi altri articoli: