AŁESANDRIA E SAN MARCO – i contati tra ła Venetia e l’Ezito no i tèrmena mìa co ła fine de l’Età antiga ma i va vanti anca inte’l Medioevo. Prima che łe crozade łe ghe garantise a i Europèi na baze comersiałe in Terasanta che ła ghe parmetese de conétarse co łe rote orientałe, l’Ezito el zera un łogo esensiałe de scanbi.
I marcanti veneti i navegava fin Ałesandria, sità siora prima bizantina e daspò àraba, ndove che i scanbiava łenjo e tesùi co łe varie marcansìe che łe venjeva da l’Àfrica e da l’Oriente, cofà spesie e metałi presiozi. Testimoniansa evidente de ’ste frecuentasion ła ze propio ła descoverta de’l corpo de San Marco evanzełista a Ałesandria inte l’828 da parte de do marcanti veneti. Termenà el parìodo de łe crozade e całada l’influensa de Venesia so l’Inpero bizantin łigà a i zenoezi, ła Serenìsima ła tornarà a ła fine de’l ’200 a vardar a l’Ezito cofà un ponto esensiałe de ła só połìtega comersiałe.
Da’l Łunaro Veneto 2022, Marso in 4 artìgołi:
- MARSO/1 – CULTI EZISI
- MARSO/2 – AŁESANDRIA & SAN MARCO
- MARSO/3 – PIERIO VAŁERIAN
- MARSO/4 – BELZONI & MIANI