IVORÁ (NOVA ÙDINE) – El 14 de otobre de’l 1901 el ze stà el dì de batezo de “Nova Ùdine”, inte’l teritorio de’l Rio Grande do Sul, in Braziłe. Ła comunità ła zera za nasesta inte’l 1883 rento ła zona de ła cusì ciamada “Quarta Colônia” come distreto nord de ła sitadina de Silveira Martins.
El nome de “Nova Ùdine” el ze dovesto a’l fato che łà l’emigrasion veneta ła zera primariamente de furlanòfoni: A no se ga da dezmentegarse che par vari sècołi (da’l 1420 a ła Segonda Guera Mondiałe) ła Patria de’l Friul, indentifegada dopo co ła Provinsa de Ùdine, ła ze stà parte de’l Stato Veneto (fin a’l 1797), de ła parte Veneta de’l Renjo Łonbardo-Veneto (soto fransezi e austrìachi) e in fin de “la Venezia” (cofà rejon de’l Renjo de l’Itałia).
Co’l nome de Ivorá (mudà inte’l 1939 par ła “braziłianizasion” forsada de i nomi), el distreto el ga deventa formalmente e ofisialmente un comun autònomo el 9 de majo de’l 1988.
I sitadini de Nova Ùdine (deso Ivorá) i ga batezà “Monte Grapa” ła ponta pì siora de łe alture che łe se cata torno de ła sità.
~
Da’l Łunaro Veneto 2019, Otobre in 4 artìgołi:
- OTOBRE/1 – Na paroła: TAŁIAN (VENETO BRAZIŁIAN)
- OTOBRE/2 – Un posto: IVORÁ (NOVA ÙDINE)
- OTOBRE/3 – Un parsonajo: PATRIARCA VENETO (E PO’ PAPA)… IN BRAZIŁE
- OTOBRE/4 – Un evento: TRIŁENGUIZMO E COOFISIAŁIZASION
