TRIŁENGUIZMO E COOFISIAŁIZASION – A Ivorá A se parla cuatro łengue. I emigradi de fine Otosento e primi Novesento da ła Venetia i se ga portà drio łe do łengue stòreghe pì grande: el veneto e el furlan.
Ła majoransa de ła popołasion ła conose el veneto, parlà in variante braziłiana, e cheła parte de popołasion che ła zera de orìzene furlana ła ga mantenjesto in pì anca el furlan.
Sora de ’sto biłenguizmo de fato, A ghe ze ciaramente anca ła łengua de Stato, che ła ze el portogheze braziłian, a conpóner un triłenguizmo intaresante asà. Vista l’orìzine da’l Renjo de l’Itałia, serti desendenti de emigradi i ga scomisià in pì anca a studiar l’italiano.
El 23 de marso de’l 2018 co ła łeje munisipałe n. 1307 el Comun de Ivorá el ze el primo munisipio de ła Quarta Colônia a far deventar el Talian (o Veneto braziłian) łengua coofisiałe insieme co’l portogheze braziłian, che’l ze oviamente ła łengua ofisiałe de’l Braziłe e cueła insenjada de derito rento tute łe scołe. I ze drio pensar de insenjar darente anca el veneto braziłian.
~
Da’l Łunaro Veneto 2019, Otobre in 4 artìgołi:
- OTOBRE/1 – Na paroła: TAŁIAN (VENETO BRAZIŁIAN)
- OTOBRE/2 – Un posto: IVORÁ (NOVA ÙDINE)
- OTOBRE/3 – Un parsonajo: PATRIARCA VENETO (E PO’ PAPA)… IN BRAZIŁE
- OTOBRE/4 – Un evento: TRIŁENGUIZMO E COOFISIAŁIZASION
