BELZONI E MIANI – ła decadensa progresiva de l’Inpero otoman inte l’800 ła consente el crésar in Ezito de l’influensa de łe potense ocidentałe. A połe rivar cusì anca esploradori e siensiài a studiar el patrimonio archeołòzego imenso de ła tera de i faraoni. Uno de i pì famozi el ze el padoan Joani Batista Belzoni (1778-1823) che, dopo arcuanti viaji par tuta l’Europa, el riva in Ezito. Inte łe só spedision archeołòzeghe el ze bon de descovèrzar reperti e siti de inportansa enorme, cofà ła tonba de Seti I e Ramses III, ła porta de ła piràmide de Chefren, l’antiga sità de Berenise. El more a ła fine in un viajo de esplorasion sercando de rivar a Timbuctù, inte l’Àfrica ocidentałe. Altro inportante esplorador veneto de’l continente african el ze el rovigoto Joani Miani (1810-1872), che’l ga conpìo tre spedision sercando de descovèrzar łe sorzente de’l Niło, morendo inte l’ùltema.
Da’l Łunaro Veneto 2022, Marso in 4 artìgołi:
- MARSO/1 – CULTI EZISI
- MARSO/2 – AŁESANDRIA & SAN MARCO
- MARSO/3 – PIERIO VAŁERIAN
- MARSO/4 – BELZONI & MIANI
