EL PRIMO COLPO – El 24 majo 1915, a łe ore 3.55 de matina, da Forte Verena l’è partìo el primo colpo de canon da parte itałiana che el ga decretà de’l tuto l’entrada in guera de’l Renjo de l’Itałia ‘nte ła Prima guera mondiałe. ‘Nte i primi dì el ga bonbardà indisturbà, insieme co forte Canpołongo, łe fortese strìache de Forte Sima Vézena, Forte Buza Verle e Forte Canpo Łuzerna provocando gravi dani (in partegołare Forte Canpo Łuzerna el ga riscià ła reza soło dopo 3 dì). L’atività de i armamenti ła jera tałe che el 26 majo do canoni da 149 mm i ze sciopài par l’uzura. L’ezèrsito strìaco l’è ndà suito in crize, consapévołe de’l riscio che ła coréa ła łinea fortifegá. El ga ciapà donca suito provedimenti e una de łe prime fortese a capitołare ła ze stà propio Forte Verena, soło cualche setimana dopo l’inisio de ła guera che ła gheva tacà eła medema co i primi colpi de canon.
Da’l Łunaro Veneto 2025, Majo in 4 artìgołi:
- MAJO/1 – FORTE VERENA (1/4)
- MAJO/2 – FORTE VERENA (2/4)
- MAJO/3 – FORTE VERENA (3/4)
- MAJO/4 – FORTE VERENA (4/4)
