Forte Verena (4/4)

ŁA DESFATA DE’L “ZIGANTE DE CREA” – Come za dito prima, seben che ła fortesa in si ła dase na idea de sòłida robustesa, in realtà, come tute cheł’altre, ła jera stà costruìa in presa e co materiałi scadenti, sensa fero par armare el semento de łe coverture co grave conseguense. El 12 zunjo 1915, njanca 20 dì da l’inisio de’l conflito, un colpo de artiłiarìa strìaca da 305mm a sciopo retardà el ga parforà ła covertura entrando ‘nte ła polvariera e copando 43 òmeni, durante ła controfensiva nemiga termenà in breve tenpo co suceso, in resposta a i gravi dani subìi da łe so fortese dopo i primi colpi da parte itałiana. I Strìaci, defati, par sercar de colpire el Forte, i se gheva visti costreti, in ùltema, a cołogare dełe batarìe mòbiłe da 305 mm e 420 mm. ‘Sta mosa vinsente ła ga decretà ła destrusion prategamente definidiva, ‘nte i tre dì dopo de’l colpo da 305mm, de’l Verena che, sprovisto de armamenti ùtiłi par seitar conbàtar l’è stà doparà soło come oservadoro fin a’l 22 majo 1916 durante ła Strafexpedition cuando che l’è stà ocupà e doparà da łe trupe strìache fin a ła fine de ła guera.