ŁA PRIMA UNIVARSITÀ VENETA… e no ła ze mìa Padoa – Inte l’ano 1204 A jera stà fondà l’Univarsità de Visensa, ativa par pochi ani fin a’l 1209, e che donca ła pol èsar considarà el primo Studio univarsitario de ła Storia Veneta.
Un documento de’l 1205 el atesta ła donasion de ła cieza de San Vio a i scołari de’l Studio de Visensa e i vien sità i nomi de cuatro retori. ‘Sto sciapo de studenti e profasori i venjéa da l’Univarsità de Bołonja indóe che i jera in rota co’l Comun che’l serchéa de łimitar ła só “libertas scholarium“.
Inte’l Studio vizentin A se seitava, oltra che teołozìa e matemàtega, anca derito siviłe e derito canònego, materie esensiałe inte na sità che ła contéa, a chel tenpo, pì de duzento nodari.
Inte’l 1209, un ano tormentà pa’ Visensa, a i studenti A ghe subentra i Camaldołezi e i univarsidari i va via da ła sità. A no ze mìa ciaro se i sipia ndài a Pava opur a Bołonja, fato ze che inte’l 1222 a Pava venjarà fondà el ben sèłebre “Studium Patavinum”,cueła che ancó ła ze ła Univarsità.
~
Da’l Łunaro Veneto 2019, Zenaro in 4 artìgołi:
- ZENARO/1 – Na paroła: ŁÀUREA
- ZENARO/2 – Un posto: PIANETA VÈNERE – CRATERE PISCOPIA
- ZENARO/3 – Un parsonajo: ROZALBA CARIERA
- ZENARO/4 – Un evento: ŁA PRIMA UNIVARSITÀ VENETA (e no ła ze mìa Padoa!)
