Ła Guera de Cioza (2/4)

ŁE AŁEANSE E I PRIMI SCONTRI – Inte’l 1378 Zenoa ła crea un fronte łargo de ałeanse miłitare unendo tuti i nemighi de Venesia: el re de Ongarìa, el patriarca de Acuiłeja, el duca Łeopoldo de Àustria, Fransesco da Carara senjor de Padoa. Ła sità łìgure ła se gavarìa donca batùo so’l mar, gavendo da tera el sostenjo de’l re ongareze che’l mirava a concuistar ła Dalmasia, co invese el patriarca, el duca e el senjor carareze che i pontava a casar fora i Venesiani da Trevizo e da Trieste. Venesia, da parte sua, ła otien de łigarse soło co i Visconti de Miłan che i vołeva reotenjer el controło so Zenoa. Ła prima bataja so’l mar ła vien vinta da’l capitan da mar Vetor Pizani a’l desboco de’l Tèvere contro na flota zenoeze. Ma na seconda armada ła vien mandà da i Zenoezi in Adriàtego, sconfizendo Pizani inte łe acue de Poła inte’l 1379.