Ła Guera de Cioza (3/4)

ŁA GUERA IN ŁAGUNA – Ła tremenda sconfita subìa da Pizani ła ghe łasa canpo łìbaro a i Zenoezi che i entra Cioza Menor e dapò i òcupa, dopo un duro asedio, Cioza Mazor, gavendo łe porte spałancàe par tacar diretamente Venesia. De fronte a na situasione tanto parigołoza Venesia ła dimanda ła paze, ma el comandante zenoeze Pietro Doria el ła refuda. I Venesiani, ałora, in uno de i momenti pì duri e tràzeghi de ła só storia, i fa el màsemo sforso par fortifegar e blocar tuti i ponti stratèzeghi de ła łaguna e par inbastir su na nova flota. Insieme co i renforsi de Carlo Zen rivài da l’Oriente, i ze boni de blocar i nemighi da tute łe parte e de reconcuistar Cioza, servéndose anca, pa’ ła prima volta inte ła Storia, de artiłiarìe montàe so nave. El 22 zunjo de’l 1380 onji forma de rezistensa da parte de i łìguri ła finise.