Ła Guera de Cioza (4/4)

ŁA PAZE DE TORIN E ŁE CONSEGUENSE – Dopo de ła reconcuista de Cioza A no se rezistra so’l mar altre sinjifegadive bataje. I sforsi e łe pèrdite da parte de łe do sità łe zera stàe enorme. In pì ła spedision punidiva de Vetor Pizani ła termena presto par via de ła só morte par małatìa e Venesia ła se catava duramente presà in teraferma da’l fronte nemigo. A se riva ałora inte’l 1381 a ła paze de Torin co Amedèo VI de Savoia a far mediasion. Venesia ła ga da cédar vari teritori: Trieste a’l patriarca, Trevizo a l’Azburgo, ła Dalmasia a’l re ongareze, Tènedo a Amedèo VI. Zenoa ła łìbara i teritori ocupài ma ła tien el controło so Sipro. Nonostante ła duresa de ’ste condision, Venesia ła soravive cusì a na situasion de estremo parìgoło e presto ła recupararà tanti de i teritori persi, invese Zenoa ła ndarà incontro a instabiłità połìteghe e domini foresti.