Ła Guera de Cioza (1/4)

ŁE RAZON – Inte i do deseni drio ła fine de ła Guera de i Streti Venesiani e Zenoezi i torna conpètar par el controło de łe vie de comerso marìtemo de’l Mediteraneo orientałe anpliando i só posedimenti e fazendo crésar drioman łe tension. In partegołare Zenoa inte’l 1374 ła ze bona de ocupar miłitarmente el Renjo de Sipro, Venesia invese ła otien da l’inperador de Bizansio Zuane V Pałełòłogo, in via definidiva da’l 1364, l’ìzoła de Tènedo, un ponto stratèzego fondamentałe che el parmete de controłar l’aceso a l’inbocadura de’l streto de i Dardanełi. Zenoa ła vede ałora menasà ła rota verso łe só importante cołonie inte’l Mar Mazor (el Mar Nero) e ła tenta de ciapar poseso de Tènedo, anca fazendo tenporaneamente montar so’l tron Andronico IV, fioło e rivałe de Zuane V, ma sensa rezultado. A se riva donca a’l scontro direto tra łe do potense marìteme.