Ła guera de Cùrsoła (4/4)

ŁA GUERA DE CÙRSOŁA (4/4): łe conseguense – Ła bataja de Cùrsoła ła raprezenta na vitoria so’l canpo par Zenoa, anca se Venesia ła ze bona suito dopo métar in canpo n’altra flota consistente e nesuna de łe do ła ze bona de prevałer. A se riva cusì inte’l 1299 a ła firma de ła paze a Miłan, sostenjùa da’l novo senjor de ła sità łonbarda, Matteo Visconti. Ła paze ła durarà otanta ani, co’l reconosimento da parte de łe do sità de ła supremasìa so i rispetivi mari (Adriàtego e Tiren) e ła proibision de agresion tra łe propie nave. I scontri tra Venesia e Bizansio, parò, i durarà ancora tre ani, fin che l’inperador no’l ze costreto a conpensar i dani fati a Venesia.