SCONTRI IN TERASANTA – Venesia ła se ałèa intanto co Piza, Marseja e i porti de ła Provensa contro Zenoa, ła rivałe invese ła otien el suporto de’l re de Zeruzałeme e cueło de l’Armenia. Venesia ła ze bona co ła só flota de ndar rento el porto de Acri, destrùzar łe nave zenoeze e de ciapar e devastar el cuartier e el casteło nemigo inte ła sità. Daspò vari scontri navałi, i veneti i ze boni de vìnsar ła bataja desiziva de Acri el 24 zunjo 1258. Zenova ła zera intanto ocupà da łote interne. A se riva donca a na tregua favorìa da’l papa Ałesandro IV che ła prevedeva che i zenovezi i butase zó łe só fortifegasion inte ła sità conteza e che i renunsiase a i priviłezi che i ghe gaveva. Ma a chel ponto el patriarca de Zeruzałeme el pretende che anca veneti e pizani i mołase tuti i só deriti in sità, cusì da novo i scontri i rescomisia.
Da’l Łunaro Veneto 2022, Novenbre in 4 artìgołi:
- NOVENBRE/1 – SAN SABA, ŁE CÀUZE
- NOVENBRE/2 – SAN SABA, SCONTRI IN TERA SANTA
- NOVENBRE/3 – SAN SABA, ŁA CAJÙA DE L’INPERO ŁATIN
- NOVENBRE/4 – SAN SABA, ŁA PAZE
