Marsiłio da Padoa (4/4)

Prinsipi formałi de ła łeje siviłe – Se i pontèfeghi i gavese anca el poder tenporałe, A venjarìa fora che i podarìa far cueło che i vołe co bona paze de cheł’altri, sendo cusita ła càuza efisiente fondamentałe de ła descordia. El poder połìtego el ga donca da deféndarse grasie a ła vis obligandi, propia de ła potestas coactiva che ła ze sua e solche sua de ła łeze siviłe. Ła łezitemasion de ła łeze siviłe, a dir el só aspeto pì scetamente formałe, ła se identìfega co ła coercision stesa. E ’sta sorta de łezitemasion cuà A se połe catarla drio el fato che par Marsiłio nisuna asenblèa, che ła reprezenta l’universitas civium, ła podarìa mai aprovar co consapevołesa na łeje che ła vae contro i só stesi intaresi e conpanjo ła gavarìa pì respeto par na łeze che eła stesa ła ga promulgà.