Modeło de produsion (2/4): ARSENAL DE'L STATO

ARSENAL DE’L STATO VENETO – Antigo conpleso de cantieri navałi e ofisine che’l costituise na parte tanto esteza de ła sità insułar de Venesia, verso matina. El ze stà el cor de l’industria navałe venesiana a tacar da’l XII sècoło e’l ze łigà a’l parìodo pì flòrido de ła vita de ła Repùblega Veneta.

Grasie a ła só organizasion, l’arsenałe de Venesia el ga antisipà de alcuni sècołi el conseto moderno de fàbrega, intendesta come conpleso produtivo che in cueło maestranse spesiałizàe łe ezegue in sucesion łe sìngołe oparasion de asenblajo de un manufato, ndàndoghe drio a na caena de montajo e doparando conponenti standard.

El raprezenta l’ezenpio pì inportante de gran conpleso produtivo a strutura sentrada de l’economìa preindustriałe. Ła suparfisie ła se estende so de n’area de 48 ètari (el 15% de ła suparfisie de ła sità).

El conpleso el costituise l’ùnego ezenpio inte ła Storia de cantier navałe e fàbrega de arme che’l ga sempre mantenjùo ła stesa natura e ła stesa funsion, par sete sècołi, anca dopo de ła fine de ła Repùblega Veneta.

~

Da’l Łunaro Veneto 2019, Łujo in 4 artìgołi:

  • ŁUJO/1 – Na paroła: ARSENAL
  • ŁUJO/2 – Un posto: ARSENAL DE’L STATO
  • ŁUJO/3 – Un parsonajo: ARSENAŁOTI
  • ŁUJO/4 – Un evento: DA’L CADORE A ŁA ŁAGUNA
Dizitałizasion de’l testo de Łujo 2019 de’l Łunaro Veneto 2019.
Reprodusion autorizà da Academia de ła Bona Creansa

Leggi altri articoli: