ARSENAŁOTI – Inte ła Serenìsima Repùblega Veneta i arsenałoti i jera na corporasion de miłitari-oparài inpiegài inte l’Arsenałe de Venesia, costituìo inte’l XII sècoło co l’acorpamento e ła statałizasion de łe atività de cantierìstega navałe.
I minbri de ‘sto corpo sosiałe i gaveva ła custodia de l’Arsenałe e i abitava pardepì inte łe só visinanse. I jera pasìbiłi de morte o de bando parpetuo se i venjeva descoverti colpévołi de furto o danejamento. A i só cai A jera proibìo łasar el taritorio de’l Stado sensa el parmeso esplìsito de’l goerno.
Stipendiài a vita da’l Stado e garantìi in cazo de małatìa, i arsenałoti i costituiva el fulcro de ła marinarìa venesiana. El nùmaro de arsenałoti el rivava, inte i parìodi de piena atività produtiva, a ła cuota media zornałiera de 1500-2000 unidà, co na ponta de 4500-5000 iscriti a’l Łibro de łe maestranse, pari donca a’l 2-5% de ła popołasion sitadina de l’època.
I arsenałoti i jera incuadrài drio łe diverse Scholae de mestieri, da i marangoni a i całafiti, da i cordari a i fabregadori de remi.
~
Da’l Łunaro Veneto 2019, Łujo in 4 artìgołi:
- ŁUJO/1 – Na paroła: ARSENAL
- ŁUJO/2 – Un posto: ARSENAL DE’L STATO
- ŁUJO/3 – Un parsonajo: ARSENAŁOTI
- ŁUJO/4 – Un evento: DA’L CADORE A ŁA ŁAGUNA
