Organizasion de l’Ezèrsito Veneto (2/4)

TERITORI E EZÈRSITO – L’Infantarìa Veneta ła zera organizà co 18 Rezimenti de łinea, 10 Rezimenti Nasionałi pì una de conpanjìe verte. I teritori dove che łe venjeva cołogàe łe trupe de l’Infantarìa Veneta i zera dividesti in reparti: ła Teraferma co ła Łonbardìa Veneta – che ła ciapava rento łe sità de Bèrgamo, Bresa, Sałò e Crema – el Veneto co łe só provinse, e el Furlan fin a’l confin càrnego. A ghe zera po’ el reparto de ła Dalmasia che’l ciapava rento: l’Istria, parte de ła Croasia, ła Dalmasia e l’Albania Veneta, el reparto de’l Golfo co łe fortese a łe boche de Càtaro, deso ciapàe rento inte’l Montenegro e in fin el reparto de Łevante co łe ìzołe Greghe cofà Corfù, Sefałonia, ła Morèa, Candia e altre menore; A ze importante asè recordar che onjuna de ’ste tere ła ze restà soto de’l gonfałon de San Marco in media par 350 ani. I Rezimenti Veneti i venjeva reconosùi co el nome de’l Cołoneło che’l łi comandava, fora che i ùltemi cuatro che i ga ciapà el nome da łe sità de provenjensa: XV Rez. Rovigo, XVI Rez. Trevizo, XVII Rez. Padoa e XVIII Rez. Verona. A ghe zera po’ el Rez. Veneto Real, i Oltramarini diti Sciavoni, ła cavałarìa co i Dragoni e i Croati a cavało, i Corasieri, el Rez. Artełieri e Bonbardieri, el Zenio miłitar, łe sèrnide o cràine – trupe teritoriałe a ferma vołontaria – e a ła fine ła glorioza Marina da Guera Venesiana.