Veneta astronomìa (2/4): ALTOPIAN DE I SETE COMUNI

ALTOPIAN DE I SETE COMUNI (Venetia) – Inte el Altopian A se cata l’Oservadorio Astrofìzego de Aziago, che’l ze on oservadorio astronòmego de proprietà de l’Univarsità de Pava e che’l ze jestìo da’l Dipartimento de Fìzega e Astronomìa de ła stesa.

El ze stà fato sù inte’l 1942 co l’instałasion de cuel che, inte i tenpi, el jera el pì gran tełescopio refletor de k’Europa (122 cm de diàmetro de i speci) dedegà a’l siensiado pizan Galileo Galilei che’l gheva insenjà purpio inte’l atenèo pavan.

Senpre inte’l Altopian A ghe ze anca ła Stasion Oservadiva Astronòmega de Sima Èkar, inte’l Comun de Gałio, de proprietà de l’Istitudo Nasionałe de Astrofìzega (INAF).

Ła ze stà fata sù inte’l 1973 co l’inaugurasion de’l pì gran strumento òtego inte’l teritorio itałian: el tełescopio refletor da 182 cm de diàmetro denominà “Copernico”. A ghe ze instałà anca el “Asiago-DLR Asteroid Survey” (ADAS), che co cueło i siensiadi i ga descoverto arcuanti asteròidi.

~

Da’l Łunaro Veneto 2019, Agosto in 4 artìgołi:

  • AGOSTO/1 – Na paroła: PARAŁASE
  • AGOSTO/2 – Un posto: ALTOPIAN DE I SETE COMUNI
  • AGOSTO/3 – Un parsonajo: BEPI COŁONBO
  • AGOSTO/4 – Un evento: 20 OTOBRE 2018
Dizitałizasion de’l testo de Agosto 2019 de’l Łunaro Veneto 2019.
Reprodusion autorizà da Academia de ła Bona Creansa