Scritura de i Veneti antighi (3/4)

ŁA ŁENGUA – Drio i studi łenguìsteghi, ła łengua de i Veneti primi reportà da łe iscrision ła sarìa na łengua indoeuropèa che ła ga dełe somejanse co’l łatin. A ze so ’sta somejansa co’l łatin che se baza i tentadivi de intarpretasion de ła łengua venètega, traverso de conparasion. Maldestin, na bona parte de i testi i ze framentari, brevi asà e speso anca i reporta testi co fòrmułe fise, donca ła nostra conosensa de ła łengua de i Veneti primi ła ze asà łimità. In partegołare, un gran nùmaro de iscrision łe ze de caràtare votivo e łe reporta soło el nome de l’ofarente, de’l benefisaro e a volte de ła divinità. Fortunadamente A ze stà descoverte anca dełe iscrision mìa votive ma pùbleghe, pì łonghe e conplese, in partegołare ła Tołeta de Este che ła reporta probabilmente un pato tra do comunità.