TORNADO – El tornado, o tronba de aria (o anca tórcoło, sion o bisineło), el ze un parigołozo fenòmano atmosfèrego che’l pol manifestarse anca in Veneto. De fati A se cata cazi resenti e pasadi de tornadi asè destrutivi.
El stòrego Jacopo Filiasi el ne conta de do tùrbini che i gavéa colpìo ła łaguna e Venesia inte’l 1410 e inte’l 1657 provogando mełiari de morti e destrusion.
Inte’l 1930 A ghe jera stà ła tremenda “Tronba de’l Monteło“, inte’l trevizan, co venti de 300 km/h. Inte’l 1970 A ghe ze stà un tornado che a Sant’Ełena de Venesia el ga rebaltà un vaporeto cauzando 21 morti. Altri tornadi devastanti i se ga verìfegà el 6 zunjo 2009 a Vałà de Rieze Pio X e l’8 lujo 2015 inte ła Riviera de ła Brenta, cauzando parsone ferìe, edifisi desfài e anca un morto.
~
Da’l Łunaro Veneto 2020, Majo in 4 artìgołi:
- MAJO/1 – TORNADO
- MAJO/2 – DOŁO
- MAJO/3 – ERICA BOSCHIERO
- MAJO/4 – SANREMO 1997
