El "Péso", clasifegasion e nome veneto (1/4): PICEA ABIES

PICEA ABIES (L) H.Karst..– Fameja Pinaceae. El vien falsamente ciamà “Abete Roso” drio el corespondente in itałian, o pezo ancora Pino, in realtà el nome comun pì coreto el ze propio cueło veneto: Péso (o anca “péth”, inte’l bełumat, par ezenpio), fazendo łu parte de’l zènare Picea.

A dirla justa in itałian el ghe ze el nome “peccio”, parò doparà da pochi o nisuni. “Abete Roso” no el pol mìa èsar parché no ła ze mìa na pianta che ła ghe partien a’l zènare Abies, come che’l ze invese el ”Abete bianco” Abies alba.

Manco oncora “Pino” parché no’l fa parte njanca de’l zènare Pinus. Tute piante che łe ze de ła stesa fameja ma co caratarìsteghe difarente.

A ghe ze na batuda de spirto che ła dize che i Venesiani i cojonava i montanjari parché i ghe ciamava “Pési” a łe piante, anca se de mar no ghe ne ze in montanja, e njanca de pescadori.

~

Da’l Łunaro Veneto 2019, Desenbre in 4 artìgołi:

  • DESENBRE/1 – Na paroła: PICEA ABIES
  • DESENBRE/2 – Un posto: EL PESO
  • DESENBRE/3 – Un parsonajo: CARL VON LINNÉ
  • DESENBRE/4 – Un evento: ŁA PIANTA
Dizitałizasion de’l testo de Desenbre 2019 de’l Łunaro Veneto 2019.
Reprodusion autorizà da Academia de ła Bona Creansa