El "Péso", clasifegasion e nome veneto (2/4): EL PÉSO

EL PÉSO – el ze na conìfara asà frecuente nte łe nostre montanje e in tuto l’arco alpin. Un destermìnio de ètari dedegà a ła selvicoltura el ze in Rusia.

Łe condision otimałe el łe ga tra i 1200 e i 1800 metri de altitùdene. Ła gran prezensa nte łe nostre montanje ła ze dovùa pì che altro a i renboschimenti che i ze stà fati sia da ła Repùblega Veneta, par dopararlo inte łe costrusion urbane che inte’l cantier navałe par interni de łe nave, che anca da’l Regno d’Italia, che daspò de ła guera el se ga meso reforestar utiłizando pì che altro péso piantà fiso, na sielta colturałe mìa tanto intivada parché dezbałansando l’ecuiłibrio tra łàreze e abeso bianco el bosco el rezulta pì fiaco e manco stàbiłe.

El vien alto fin a 40 metri e el pol èsar asà łonzevo, l’Old Tjikko in Svesia el ze un péso che el ga sevità rabutare nte i miłeni co na stima de età de 9550 ani.

~

Da’l Łunaro Veneto 2019, Desenbre in 4 artìgołi:

  • DESENBRE/1 – Na paroła: PICEA ABIES
  • DESENBRE/2 – Un posto: EL PÉSO
  • DESENBRE/3 – Un parsonajo: CARL VON LINNÉ
  • DESENBRE/4 – Un evento: ŁA PIANTA
Dizitałizasion de’l testo de Desenbre 2019 de’l Łunaro Veneto 2019.
Reprodusion autorizà da Academia de ła Bona Creansa