ŁA PIANTA – ła fiorise in apriłe-majo. El produze dełe infioresense mascołine (microsporòfiłi) de cołor załeto ciaro, e dełe infioresense femenine (macrosporòfiłi) de cołor roso che daspò łe deventarà penje e, difarente a l’abeso, łe cascarà zó intiere. Un péso el va in frutifegasion daspò 20-50 ani.
A ze costumansa picar rame de Péso in sima el cuerto de na caza in costrusion par anunsiar ch’A ze cuazi finìo i łaori. El ze el clàsego àlbaro de Nadałe.
‘Sti ani el venjéa doparà cofà sìma de łe piante za tajà par altri scopi, ma deso A ghe ze ła produsion de àlbari cełi vivi da cavar sù par Nadałe. ‘Sta cuà ła ze na moda che ła va morir par i costi e par cuestion pràteghe. Pardesòłito, scuazi tuti i Pési ch’A ghe ze in volta inte i zardini, de 100 bałe 90 i zera àlbari de nadałe soravivesti par miràcoło e metesti zó so tera parché i fazéa pecà.
~
Da’l Łunaro Veneto 2019, Desenbre in 4 artìgołi:
- DESENBRE/1 – Na paroła: PICEA ABIES
- DESENBRE/2 – Un posto: EL PÉSO
- DESENBRE/3 – Un parsonajo: CARL VON LINNÉ
- DESENBRE/4 – Un evento: ŁA PIANTA
