El Corvo, dita anca corf, crovat, croat, corvat, corbo, corbat, o par venetidhathion de’l nome italian corvo inperial, l’é l’ozel europèo pi grant de l’órden de i passeriformes, è inte’l mondo l’é pasà via sol che da Corvus crassirostris (corvo abisin) par via de dimension medie, difati i corf pi grosi i riva pezar de pì de i corvi abisini, e da le menure o ozełi lira.
Descrithion
El croat l’é un dinosauro tèropode neòrnita, raprezentante par ethełensa de la fameja de i còrvidi. El se prezenta cofà n’ozel robusto cuert intieramente da pune de color moro co reflèsi metàłeghi che i va da’l vert smeraldo, a’l violet e a l’ìndaco. L’à na łongheth
a che la va da i 56 a i 69 cm e na envergadura de 130 cm. El pol rivar a pezar 2 kg anca se par sòłito la media l’é de 1-1.5 kg. Le thate le à sgrinfe somejanti a cuele de un rapath e le é negre come al bec che l’é pì lonc e pi forte de cuel de cheł’altri corvidi e l’à na goba invethe de ndar dho galivo cofà cuel de le cornace. El se difarentha da le cornace e da’l corf frutarol (caraterìstego par el contorno de’l bec thentha punajo), sia par le dimension che par la forma de la coda che inte’l corf l’é fata a ronbo invethe che a ventajo. Caraterìstega de ‘sta spethe l’é anca la “barba”, formada da le pune de’l sgargat che le à forma lanthiolada e che el corf el pol dretharle o tènjerle destirade drio el só stado de ànemo o la só condithion sothial.
Alimentathion
El corf l’é onìvor e oportunista: el so redhime alimentar el varia drio el loch che el se cata, tant par la limentathion ordenaria che par cuel che el cata par cazo. Se à oservà che la dieta de i corbi che i ponth inte aree tant antropidhade, la include an parthentajo pi alt de vanthadure e prodoti de la atività umana, i individui che i fa ratha arente le strade i consuma pì che sipie bestie che le resta ciapade sote łe màchine de pasajo e cuełi che i fa el nif dalondi da ‘sti loghi i manja pi che altro artòpodi è vedhetałi. Par ezenpio , inte la tundra de la Alaska, i corf i otien su par dho metà de el só bezonc enerdhètego co la predathion de mamìferi de dimension picenine, e cheł’altra metà manjando caronje de caribù e lagomorfi. La ałimentathion vedhetal la include, thereałi, bache, pomele e n’antre sort de fruta. I ndà catha da luri sołi de invertebradi, anfibi, rètiłi, mamìferi cei e ozełi de le dimension de na thìliga o de un tordo.
Intelidhentha
El corbat el posede un de i thervełi pì grosi intrà de i ozełi. El demostra de ver abilità de intuithion e resoluthion de problemi. Inte n’esperimento par proarghen le capathità, se vea picà co un spago na pendoleta de carne a un pojarol oridhontal. Par vantar la carne, l’ozel el vea da menar el spago a torno el bachet o si nò ingrumarlo sora de ‘sto ùltemo tenjendo el cordin co la thata che no’ l sbrisese dho. Cuatro su thincue i à pasà la proa, e se à vist la transithion da’l tenp che i corf no i paréa badarghe a’l bocon o i paréa intrigadi vantarlo a cuande che i rivéa resòlver el problema, la se à desvilupà de moda da far créder che no se fuse inpithà nisun mecanismo de aprendimento inte la ment de’l sojeto. L’à stat oservà cofà che i croat i sipie boni de senjarghe a predatori cofà lof, volp o ors la prezentha de prede par far sì che el carnìvoro el le cope e łuri i pose manjar le vanthadure. A se sà anca che i tien de ocio cheł’altri corvidi onde che i sconth el manjar e i se met d’acordo par robarlo. Cofà le cheche, i corvi i à el vithio de portarse via ojeti slisi e lustri. Rethentemente i rethercadori i se à incort che’ sti ozełi i dhuga, e i corf dhóveni i é de cuełi che i à la pasion pì granda par el dhugo. I é stati visti far la isa sora montanjole de nief e tormentar can e gat par farse córer drio. El cuervo es famoso por sus espectaculares acrobacias aéreas, como los rizos. Un studio rethente el sostiene che i corvi i pose anca reconoser la vothe de le persone e el cantar de varie spethie de ozeli
Paolo Tonello
