Ła Sasìfraga de i Monti Bèreghi (2/4)

ŁA PIANTA – Un òtemo ezenpio de endemizmo, l’ùnego noto inte’l teritorio de ła provinsa de Visensa, ła ze ła Sasìfraga de i Monti Bèreghi (Saxifraga berica). Ła ze na pianta erbasea, łezarmente łinjifegà, alta tra i 10 e i 25 sentimetri. I fusti i ze asendenti e pełozeti. Ła prezenta de łe fojete bazałe palmàe de forma zlargà de 25-28 par 20-24 miłìmetri, overo ła ze dotà a ła baze de foje spartìe in pì sesion disposte a ventajo, come i dei de ła man de l’omo (un fià come ła foja de l’opio). Invese łe foje caułine, overo cuełe cołogàe so’l fusto de ła pianta, łe ga dimension manman pì redote e un oro łobà e tendensialmente łe ze de forma semisircołare. I fiori i ze peduncołài e i ga 5 pètałi bianco załastri łonghi 4-5 miłìmetri, divizi in do łobi, co un pètało che’l ze pì łongo de cheł’altri, pì raramente do.