Ła Sasìfraga de i Monti Bèreghi (3/4)

PARENTEŁE E UNISITÀ – Ła Sasìfraga de i Monti Bèreghi, o Saxifraga berica, ła ze stà censìa tra łe 470 spese de’l zènare Saxifraga, a só volta parte de ła fameja de łe Saxifragaceae. El nome Saxifraga, introdoto za da Łinèo inte’l 1753, el ze conposto da i tèrmeni łatini saxum “saso” e frangere “rónpar” e el fa refarimento a’l fato che ‘sto zènare de piante łe se insenta inte łe sfeze tra łe piere. Ła Sasìfraga de i Monti Bèreghi ła prezenta donca na serie de caratarìsteghe che łe ła acomuna a altre spese desizamente pì comune e difondeste, ma ła ga anca de i aspeti che łe ła rende reconosìbiłe: in partegołare łe foje no łe ze senpreverde, rìzide e a forma de spàtoła cofà tante altre Saxifragaceae, in pì ła prezensa de un pètało pì łongo respeto a cheł’altri 4 ła sernise da ła Saxifraga petraea che co cueła ła ze stretamente inparentada.