I njochi de patata co butiro, sùcaro, grana e caneła i ze on piato veneto, de orìzene medioevałe, tìpego de’l Połèzene. Ła tradision ła vol che ‘sti njochi i venja parecià el 29 setenbre, dì de San Michełe; e A se dize che chi che’l manja njochi el 29, el gavarà schei tuto l’ano. Ma a ze costumansa pareciarli anca par ła festa de onji santi e in ocazion de ła fine de’l Carnevałe (zobia graso); defati, A se dòpara l’espresion “zobia njocołara”.
Antigamente, ‘sti njochi i venjéa fati co farine de vario tipo: semołin, formento, rizo… e A se podéa doparar anca pan vecio seco. Pì tardi, A se ga scumisià a doparare łe patate dolse o meregane e i njochi fati co ‘ste patate i se ciamava “màneghi”: i gera bizlonghi e i do cai de onji njoco i gera a ponta.
Inte l’Itałia, l’80% de łe patate dolse el ze produzesto propio inte’l Veneto (A ze famoza ła patata dolsa de Anguiłara). Inte’ l Veneto, ła patata meregana ła ze stà introduzesta da’l mèdego e botànego padoan Giuseppe Antonio Bonato che, inte’l 1812, el ga descoverto che łe tere venete łe ga caraterìsteghe otimałe par ła coltivasion de ‘sto tùbaro. A’l dì de oncó, A ghe ze chi che’l dòpara łe patate “clàseghe” par far i njochi dolsi ma, (patata dolsa o nò) l’inportante A ze portar vanti ‘sta gran beła (e bona) tradision, che ła apartien a ła nostra maravejoza e rica cultura veneta.
Ingredienti:
- 1 kg de patate clàseghe o dolse (meregane)
- 200 g de farina “00”
- 50 g de butiro
- 30 g de sùcaro
- 1 ovo
- 1 spìsego de sałe
- caneła (cuanta che ghin vołì)
- formajo grana (cuanto che ghin vołì)
Parecio:
łavé łe patate e metiłe rento na tecia co acua freda. Scaldé l’acua e, co ła ze de bojo, łasè che le patate łe se cuzine, fin che łe deventa ténare. Scołé łe patate, caveghe ła scorsa e schisełe co’l strucapatate. Sora ła toła, na scianta infarinà, zmisié ben łe patate (strucàe) co l’ovo, el sałe e ła farina. Da l’inpasto ch’A gavì otenjù, dazighe forma a i njochi. Cuziné i njochi in acua sałà e de bojo e spetè che i venja su, so’l pel de l’acua. Doparando na sciumaroła, par far zgiosare l’acua, tołì su i njochi e consełi co’l sùcaro e co’l butiro ch’A gavì presedentemente fondesto rento na fersura. A ła fine, spolvaré i njochi co ła caneła e co na beła paca de grana. Bon apetito.
Diego R
