I BAGIGI E ODERSO – Amedèo Voltejo Obici (1887 – 1947), el ze stà un inportante inprenditor meragan nasesto a Oderso in Veneto e emigrà da bocia inte i Stati Unidi, co’l gavéa 13 ani. Rivà da soło a Scranton (Pennsylvania) el catarà un połisioto che’l ghe ofre na nozełeta meregana, a dir un aràchide, e Amedèo el dirà inte ła só łengua mare veneta “Oh, bagigi!”. Bagigi che i sarà la só fortuna visto che, inte’l 1906, el fonda ła Planters Nut and Chocolate Company, na azienda che in poco tenpo ła deventarà pròspera vendendo scatołete de bagigi tostài e sałài. Ma łu no’l se dezmentegarà mai de łe só orìzene venete rivando anca a finansiar el reparto maternità de l’ospedal de Oderso. E ła sità, inte’l 2004, ła ga intitołà a’l nome suo l’Istituto Statałe Suparior, metendo inte ła scoła na reprodusion de Mr Peanuts, a dir el logo sèłebre in tuto el mondo de l’azienda de Amedèo.
Da’l Łunaro Veneto 2022, Łujo in 4 artìgołi:
- ŁUJO/1 – PIERO CARDIN DA SAN ANDRÈA
- ŁUJO/2 – UN SARTO FUTURISTA
- ŁUJO/3 – ASTERIX E ODERSO
- ŁUJO/4 – I BAGIGI E ODERSO
