Ła Siviltà Veneta in viła (3/4)

EL PAEZAJO DE VIŁA – El cusì dito “stradon” – a dir el viałe de le viłe che’l pol èsar łongo anca tre chiłòmetri – el vien introdoto da’l Paładio a partir da Viła Emo a Fanzoło, onde che ło prozeta parpendigołare a ła Vecia Postumia romana. Dapò, inte i sècołi, el deventa na costante de’l paezajo de viła: insenbre co’l corpo de fàbrega el se confegura cofà l’ase spasiałe prinsipałe onde che i se dispone cheł’altri ełementi fondamentałi de’l paezajo: el broło, el zardin (che’l sostituirà el broło pì tardi tra’l ‘700 e ‘800), łe barchese, el serajo, ła peschiera, ła cołonbera, evc… L’intorno fondiario de ła viła, destinà a łe coltivasion, el ze caraterizà da ła cusì dita coltura promiscua, a dir l’integrasion de i canpi a seminadivo co łe piantade de varie sorte – fruteri o moreri – e co łe fiłanje de łe vide che łe vien mese zo tra n’àlbaro e cheł’altro.