El Carnevałe (2/4): EL REDOTO

EL REDOTO – Soło par Carnevałe, rento pìcołe stanse o caze pùbleghe o privàe, ciamàe “Cazini” o “Redoti” ła Serenìsima ła parmetéa el zogo de azardo.

El pì conosùo, el Redoto pùblego de Pałaso Dàndoło, el ze stà verto inte’l 1638 visin San Moizè; e el gavéa come cliente fiso el Cazanova. Serti Redoti, i zera soło par i nòbiłi, altri par el pòpoło, i artezani, łe camariere e i coghi.

A se intrava soło in màscara co ła bàuta, fora che i “croupier”, che i zera de sòłito da fameje de Barnaboti, nòbiłi cazùi che i abitava datorno de Canpo San Bàrnaba. A se zogava a’l “Faraon”, a ła Baseta, a’l Biribisi e ghe zera tanti aristocràteghi foresti e pa’l Stato Veneto i zoghi i fazeva na bona intrada inte łe case pùbleghe.

Inte’l Setesento A se contava 136 posti intra Cazini e Redoti, ma no i zera mìa tuti posti dezgrasiài o parigołozi, parché serti i zera anca sede de Academie muzegałe e de Sìrcołi łetarari, o anca sałe da bało par feste.

~

Da’l Łunaro Veneto 2019, Febraro in 4 artìgołi:

  • ZENARO/1 – Na paroła: MÀSCARA
  • ZENARO/2 – Un posto: EL REDOTO
  • ZENARO/3 – Un parsonajo: PANTAŁON
  • ZENARO/4 – Un evento: FESTEJAMENTI DE CARNEVAŁE
Dizitałizasion de’l testo de Febraro 2019 de’l Łunaro Veneto 2019.
Reprodusion autorizà da Academia de ła Bona Creansa