El Carnevałe (4/4): FESTEJAMENTI DE CARNEVAŁE

FESTEJAMENTI DE CARNEVAŁE – ’Sta festa, seben che ła ze łigada a’l parìodo de ła Cuarézema, ła ga orìzene antighe.

Za i Romani i dizéa che “semel in anno licet insanire” (“na volta inte l’ano, A se pol dar de mato”), ma el Carnevałe come che ło conosemo nialtri el vien propio da’l łatin “Carnem Levare”, che el zera defati el preseto de no manjar carne da’l primo dì de Cuarézema.

Donca, i grandi festejamenti i se fazéa el dì prima, che el ze deventà el nostro Marti Graso. Soto el Dogado de Vidal Fałier inte’l 1094 A se parla par ła prima ’olta de devartimenti pùbleghi inte i dì presedenti ła Cuarézema, ma el primo documento ofisiałe el ze un Edito de’l Senato Veneto, datà 1296.

El conseto de l’istitusionałizasion de ła festa el zera de darghe modo a’l pòpoło de burlarse de i siori sensa aver conseguense né sosiałe né łegałe, ma anca de consentirghe a i sojeti pì in vista (e donca pì controładi da’l Stato Veneto) de aver un dì de rełasamento conpleto de łe pulsion e de łe tension.

~

Da’l Łunaro Veneto 2019, Febraro in 4 artìgołi:

  • ZENARO/1 – Na paroła: MÀSCARA
  • ZENARO/2 – Un posto: EL REDOTO
  • ZENARO/3 – Un parsonajo: PANTAŁON
  • ZENARO/4 – Un evento: FESTEJAMENTI DE CARNEVAŁE
Dizitałizasion de’l testo de Febraro 2019 de’l Łunaro Veneto 2019.
Reprodusion autorizà da Academia de ła Bona Creansa